Eksposishon “Historia di Demokrasia di Boneiru” ofisialmente inougurá
Riba 9 di òktober 2025, a inougurá e eksposishon Historia di Demokrasia di Boneiru ofisialmente, un kolekshon úniko ku ta presentá e historia riku di demokrasia na Boneiru.
E eksposishon a bin dilanti den koperashon entre Konseho Insular di Boneiru i FUHIKUBO.
Durante e apertura, a duna un agradesimentu spesial tambe na e famianan di miembronan di Konseho Insular ku a fayesé, en honor di nan kontribushon na e demokrasia di e isla.
Bishitantenan di e eksposishon por sigui un liña di tempu di susesonan importante den e demokrasia di Boneiru. Tin potrètnan di kampaña polítiko, publikashonnan informativo i pamfletnan pa mira. Un di e atrakshonnan ta un réplika di e mesa di konseho, kaminda bishitantenan por sinta, saka potrèt i skirbi loke nan lo a hasi pa e pueblo si nan tabata un miembro di konseho.
Konseho Insular di Boneiru kier a gradisí FUHIKUBO i tur e famianan ku a duna nan koperashon, meskos ku tur esnan ku a kontribuí na realisashon di e eksposishon spesial akí i e evento ku ta pertenesé na dje.
Famianan ku ainda no a risibí un agradesimentu personal, por tuma kontakto via griffie@konsehoinsular.org.
Ta importante pa menshoná ku e eksposishon aki, apesar di e seremonia di apertura, ainda no ta habrí pa públiko. Nos lo duna informashon den futuro serkano tokante e dia i orario ku públiko por bishitá.