Konseho insular di boneiru lo realisá un bishita di trabou na hulanda di 13 te ku 28 di yuni 2025

Durante e bishita, Konseho Insular lo tuma parti na un serie di reunion, kongresonan i seshonnan di trabou na diferente kaminda. Den e promé siman lo tuma lugá e kumbre BES , kaminda temanan importante pa e tres entidatnan públiko lo ser trata. Durante e enkuentro aki, lo tuma lugá tambe e entrega di e liderato di e kumbre BES: Boneiru lo tuma e ròl di koordinashon for di man di Saba.

Seguidamente, riba 17 i 18 di yüni, Konseho Insular lo ta presente na e kongreso anual di Vereniging van Nederlandse Gemeenten (VNG) na Eindhoven. Riba 19 di yüni, lo tuma lugá un enkuentro bilateral ku delegashon di Sint Eustatius na Den Haag.

Riba 20 di yüni lo tuma lugá vários diálogonan ku diferente representante. Pa motibu di e situashon polítiko i sosial aktualmente na Hulanda, hopi di e diálogonan aki ta tuma lugá den forma individual. E meta ta pa, apesar di e desaroyonan aktual, e interesnan di Boneiru lo sigui haña atenshon serka e outoridat relevante.

E siguiente siman lo enfoká riba e fortifikashon interno di e trabou di konseho insular. Riba 23 di yüni lo tuma lugá entrenamentu pa miembronan di konseho insular, sigui pa un seshon di trabou tokante e vishon di struktura di Boneiru. Entre 24 ku 27 di yüni, tin planiá vários bishita di trabou na proyektonan inovativo di teknologia sustenibel, un skol trilingual i finalmente un enkuentro na Universidat di Leiden.

Ademas, un parti di e delegashon lo ta presente riba 20 di yüni na e konmemorashon nashonal anual di e herensia di sklabitut.

Ku e bishita di trabou aki, Konseho Insular ke kontribuí aktivamente na temanan manera bon gobernashon, edukashon, sustenibilidat i kooperashon regional i tuma paso konkreto den direkshon di un desaroyo strukturá i sustenibel pa Boneiru.