Konseho Insular di Boneiru ta hasi bishita di trabou na Sint Maarten i Hulanda
Un delegashon di Konseho Insular di Boneiru ta hasi un bishita di trabou na Sint Maarten i Hulanda di 9 te ku 22 di yüni. Meta di e bishita ta interkambio di konosementu, fortifikashon di e kooperashon den Reino i ponementu na atenshon di tópikonan di importansia pa Boneiru i su habitantenan.
Den e periodo akí, Konseho Insular di Boneiru ta partisipá na e Kumbre di BES (Bes Summit) na Sint Maarten ku e konsehonan insular di Sint Eustatius i Saba. Tambe na un konsulta bilateral ku representantenan di Sint Eustatius. Durante eseinan ta papia tokante retonan komun i posibilidatnan pa kooperashon den futuro entre e entidatnan públiko. Ademas durante Kumbre di BES lo traspasá ofisialmente presidensia di e kumbre pa e aña benidero di Boneiru pa Sint Eustatius.
Ademas tin kòmbersashon planiá na Hulanda ku vários organisashon i institushon, bou di kua representantenan di Eerste i Tweede Kamer i Raad van State. E kòmbersashonnan entre otro lo tin relashon ku tópikonan manera forsa di gobernashon, salubridat públiko, enseñansa, ambiente di biba i futuro desaroyo di Boneiru.
Durante e biahe di trabou akí, regularmente Konseho Insular lo kompartí novedat tokante kòmbersashonnan, enkuentronan i konosementu optené, asina habitantenan di Boneiru ta keda na altura di progreso i resultado di e bishita di trabou.