Konseho Insular ta diskutí puntonan di atenshon kuido di salú ku komishon di Tweede Kamer

E bishita di trabou a forma parti di e promé biahe di sera konosí di e komishon pa Hulanda Karibense i sentral tabata interkambio di informashon i preparashon pa futuro debatenan di e komishon, bou di kua e debate riba seguridat di eksistensia na e islanan. Durante e konsulta, e miembronan di Konseho Insular presente a pidi atenshon pa vários reto riba e tereno di salubridat públiko, bienestar i deporte. Relashoná ku esei a papia entre otro riba e diferensianan entre e sistema di kuido na Hulanda Karibense i e sistema di kuido hulandes, i tambe e konsekuensianan pa habitantenan di Boneiru.

Tambe a trata e konekshon di Boneiru ku partinan di e sistema di kuido hulandes. Den e kuadro ei a papia riba e posibilidatnan pa uso di e ‘Burgerservicenummer’ (BSN) dentro di e kadena di kuido. Segun e miembronan di Konseho Insular presente, un mihó konekshon por kontribuí na un interkambio di dato mas efisiente i sostené e dunamentu di kuido, spesialmente ora ta manda pashènt Hulanda Oropeo pa tratamentu spesialisá. Ademas a pidi atenshon pa e diferensianan den seguro di kuido na Boneiru i e konsekuensianan di eseinan pa habitantenan ku ta dependé di kuido médiko pafó di Boneiru. 

Tambe tópikonan general di bienestar i akseso na fasilidatnan di deporte pa hóbennan a forma parti di e kòmbersashon. E miembronan di Konseho Insular presente a enfatisá importansia di fasilidatnan aksesibel, kualitativo i prepará pa futuro riba tereno di kuido, bienestar i deporte pa habitantenan di Boneiru. Tambe a enfatisá importansia di un bon kooperashon entre Boneiru i e instansianan responsabel na Hulanda Oropeo pa sigui pone atenshon na problemanan eksistente.

Na fin di e konsulta, algun miembro di Konseho Insular presente a entregá e miembronan di komishon un petishon. Den e petishon akí tin vários punto di atenshon ku e miembronan ta konsiderá importante pa futuro desaroyo di Boneiru i e situashon di habitantenan.