Konseho Insular ta mira bek riba un biahe di trabou eksitoso
E biahe di trabou di Konseho Insular di Bonaire a terminá ku éksito e siman aki, despues di un seri di bishita i reunionnan formal na Sint Maarten i Sint Eustatius.
E delegashon a kuminsá nan biahe na Sint Maarten, kaminda e miembronan di Konseho Insular a partisipá den e diferente aktividatnan rondó di Dia di Sint Maarten. Durante e dia aki a para ketu na e kultura, historia i koperashon den Reino. E presensia di Konseho Insular a hasi énfasis riba e importansia di bon relashonnan i interkambio entre e islanan den Karibe.
Seguidamente, e delegashon a biaha pa Sint Eustatius, kaminda nan a partisipá den e selebrashon di Dia di Sint Eustatius. Esaki a duna e miembronan e oportunidat pa drenta den kontakto ku gobernadónan, abitantenan i representantenan di organisashonnan lokal.
Durante e estadia na Sint Eustatius, tambe a tuma lugá un reunion formal ku e Kolegio di Supervishon Finansiero (CFT). Konseho Insular a risibí un presentashon amplio tokante e estado finansiero aktual, despues di kua tabatin espasio pa hasi pregunta mas profundo i pa haña splikashon. E interkambio a wòrdu eksperensiá komo balioso, mirando e importansia di transparensia i e kuadronan finansiero kla pa Hulanda Karibense.
Finalmente, Konseho Insular di Bonaire a tene un konsulta bilateral ku e Konseho Insular di Sint Eustatius. Durante e seshon aki a diskutí vários tópiko ku ta toka tur dos isla, inkluyendo akuerdonan aktual, desafionan kompartí i e deseo pa fortalesé e koperashon mas aleu.
E biahe di trabou a resultá den kontaktonan nobo, relashonnan fortalesé i vishonnan balioso. Konseho Insular ta wak bèk riba un biahe eksitoso i produktivo, i ta kontinuá pa mantené e resultadonan ku a sali for di e biahe aki.