Konsehonan Insular di BES ta reuní na Boneiru pa e Kumbre di BES
E Konsehonan Insular di BES a reuní awe riba 4 di sèptèmber na Boneiru pa e Kumbre di BES, kaminda a tuma lugá diskushonnan importante tokante gobernashon, reforma di belasting, i inisiativanan di kuido di salú ku ta afektá e islanan di Boneiru, St. Eustatius i Saba.
Entre e puntonan di agènda pa diskushon tabata e konsulta di WolBES/FinBES ku a start resientemente i e siguiente pasonan, diskushonnan riba e rapòrt di IMF, struktura di belasting, i e Plan di Impuesto pa 2026/2027. E kumbre tambe a enfoká riba esfuersonan di investigashon di kuido di salú kontinuo, ku un komishon dediká pa proponé tópikonan di investigashon konhunto pa mehorá kolaborashon na tur e islanan. Un kolaborashon similar tabata proponé pa tópikonan di investigashon konhunto pa e kontrolaria pa sigui mehorá e kolekshon di datonan eksakto tokante tópikonan komun.
E konsulta aktual via internèt di WolBes/FinBEs, ku a kuminsá dia 2 di sèptèmber, a generá interes i debate signifikante. E konsulta públiko aki, ku ta habrí te ku 27 di òktober, ta atendé vários tema sumamente importante, entre otro e ekspanshon proponé di e ròl di Representante di Reino den supervishon di gobernashon. Mester tuma nota sinembargo ku promé ku e konsulta internet akí no a tene konsulta profundo ku e islanan mirando ku e kontenido di e konsulta pa algun parti, a violá e akuerdonan ku e islanan i e sekretario di estado a establesé na mart di 2024 durante e konferensia na De Bilt.
A yega na un logro importante ku e proseso di introdukshon di e “Fiscale Verzamelwet”, ku awor ta habri pa konsulta públiko. E inisiativa akí ta un reakshon riba e opservashonnan di IMF pa loke ta trata e tópikonan inadekuado di e leinan di belasting eksistente, habriendo kaminda pa un kuadro di belasting mas efektivo pa e islanan BES. Den lus di e desaroyonan akí, Tweede Kamer a urgi konsultanan signifikante ku representantenan di BES pa garantisá ku futuro amiendanan di belasting ta kumpli ku e nesesidatnan di e islanan. E intentonan pa yega na un proseso di konsulta signifikante ta marka un paso vital den enbolbí di stakeholdernan i kolektá komentario balioso.
Un enfoke klave di e kumbre tabata e nesesidat pa datonan eksakto tokante e Algemene Bestedingsbelasting (ABB) i mehorashon di transparensia den reportahe finansiero. Partisipantenan a papia tokante retonan relashoná ku kompartí informashon eksakto i e persepshon di mal maneho finansiero, enfatisando e importansia di konstruí konfiansa a traves di datonan eksakto.
E kumbre tambe a atendé asuntunan sosioekonómiko, inkluyendo e impakto di oumento di salario mínimo i nivelnan di pobresa riba e Islanan BES. Partisipantenan a suprayá e nesesidat importante pa kontrolaria garantisá transparensia i responsabilidat riba tur e islanan, miéntras ku a enfatisá e nesesidat pa akshon di kolaborashon entre e islanan pa atendé ku implikashonnan finansiero.
Den un konteksto mas amplio, e diskushonnan a trata e implikashonnan di kambio den e struktura di gobernashon di Karibe Hulandes, ku preokupashonnan tokante e disminushon di outoridat lokal, ku a lanta kabes. Mirando e importansia di e tópiko akí, a hasi un proposishon pa prolongá e reunion despues ku e kumbre formal di BES a konkluí, pa asina sigui analisá e asuntunan di gobernashon akí i garantisá ku bosnan lokal ta keda representá den e proseso di tumamentu di desishon.
Durante e dia akí e Konsehonan Insular tambe a tuma algun tempu pa reflehá bèk riba e echo ku e aña akí ta kumpli 15 aña di e status konstitushonal aktual di e islanan. Riba 10-10-10 e tres islanan a keda mará na otro den e struktura aktual akí. Durante e momentu di reflekshon akí a tuma tempu pa wak bèk riba e orígen, e intenshon, e ehekushon i eksperensianan pa loke ta trata e aktual status di BES. A hasi un reflekshon riba mehorashonnan i adelantonan hasi durante e periodo akí pero tambe regreso i défisitnan konstitushonal ku a realisá durante e periodo aki. Un análisis di profundidat inkorporando dato i informashon históriko lo sigui pa asina komprondé mihó e estado aktual di e islanan BES.
Mester tuma nota ku banda di e kumbre di BES tambe a duna e konsehonan insular presentashonnan tokante seguridat di kuminda na Boneiru i posibel kolaborashonnan riba investigashon di esaki, a duna un presentashon tokante haf di Boneiru inkluyendo retonan i aspektonan práktiko i tambe un presentashon tokante e biblioteka aktualisá di Boneiru i e ròl komunitario di sosten ku e ta hunga pa e residentenan lokal na Boneiru. A enfoká tambe riba agrikultura i e posibilidatnan pa kunukeronan lokal i produkshon lokal na eskala chikí.
E Konsehonan Insular BES ta reafirmá nan kompromiso ku transparensia, koperashon konstruktivo, i gobernashon sano, miéntras ta enfatisá e importansia di envolvimentu públiko kontinuo den forma futuro di nan islanan.