Kumbre bes yüni 2025: union i progreso
Dia 16 di yüni 2025, Konseho Insularnan di Boneiru, Sint Eustatius i Saba a konkluí un kumbre ES produktivo i unifiká na Den Haag, ku a demostrá un espíritu nobo di kooperashon i meta komun entre e islanan Karibe Hulandes.
E enkuentro aki, ku a tuma lugá den Igluu Meetings & Events na Den Haag, tabata karakterisá pa diálogo habrí i rèspèt mutuo. Esaki ta prueba kiko nos por logra ora nos traha huntu, sin tene kuenta ku limitashonnan geológiko.
Temanan ku a toka durante e enkuentro aki tabata salubridat, impuesto, kriminalidat, konsulta tokante WolBES i FinBES, kontrolaria general i e entrega di e presidensia.
Ku mira riba e nesesidatnan urgente den área di salubridat riba e islanan, e Konseho Insularnan a tuma desishon pa forma un komishon di salubridat, ku lo konsistí di dos representante di kada isla. E komishon aki lo establesé prioridatnan pa investigá enfokando riba mehorashon spesífiko pa kada isla. Lo presentá e resultadonan durante e siguiente kumbre BES na sèptèmber.
Pa demostrá solidaridat ku Boneiru, e tres Konseho Insularnan lo sali ku un deklarashon konhunto tokante strategianan pa prevení kriminalidat. Aunke durante un reunion entre Sint Eustatius i Ministerio di Finansa; e ministerio a menshoná ku no tin plannan nobo di impuesto pa 2026, e Konseho Insularnan a komprometé nan mes pa kontinuá ku e diskushon tokante kualke kambio òf ahuste den e struktura aktual di impuesto.
Despues di reseso di verano, Saba ta plania pa stipulá nan ordenansa di kontrolaria general. Kada isla lo presentá nan proposishon pa fortalesé kooperashon regional den área di kontrol i supervishon.
E kumbre a finalisá ku entrega ofisial di e presidensia di kumbre BES dor di Saba na Boneiru, ku awor lo tin e liderato di e kumbrenan te yüni 2026. E reunionnan lo ta presidí pa señor Benito Dirksz, ku ayudo di griffier Jacqueline Harewood i señora Daisy Coffie komo visepresidente.
E Memorandum of Understanding (MoU), ku a keda akordá durante e kumbre BES na Saba den febrüari último i despues stipulá pa e tres Konseho Insular, a keda firma formalmente dia 17 di yüni 2025 pa e gezaghebbernan di Saba i Sint Eustatius, huntu ku e griffiernan di Saba, Sint Eustatius i Boneiru, durante e almuerso di Karibe di VNG. Gezaghebber di Boneiru, ku no a biaha pa Hulanda, lo firma e MoU na un fecha posterior.
E reunionnan aki ta sigui marka un kooperashon strukturá i produktivo entre e islanan BES. E kumbre BES di yüni 2025 a pone un tono di konfiansa pa e luna benidero, karakterisá pa transparensia, determinashon, i un kompromiso profundo pa avansá e interes di e abitantenan di Boneiru, Sint Eustatius i Saba.
E próksimo kumbre BES lo tuma lugá dia 4 di sèptèmber 2025 na Boneiru.