Miembronan di Konseho Insular di Boneiru a regresá for di biahe di trabou na Hulanda

Partisipashon na kongreso di InterExpo na Den Haag

Durante e kongreso di tres dia di InterExpo na Den Haag, miembronan di Konseho Insular a partisipá aktivamente na un programa supstansial. E kongreso a keda habrí ku diskursonan di, entre otro, Eddie van Marum (Staatssecretaris), Jan Peter Balkenende (eks-prome minister di Hulanda), Ernst Hirsch Ballin (eks-minister di Hustisia i seguridat), Sarah Wescot-Williams; Presidente di parlamento di Sint Maarten i Luc Mercelina; Prome minister di Sint Maarten, siguí pa un debate ku representantenan di Aruba, Kòrsou, Sint Maarten i Hulanda.

Den e dianan despues, presentashonnan i pènelnan tabata tokante temanan manera finansa, enseñansa i desaroyonan sosial, kaminda miembro di Konseho Insular Daisy Coffie a partisipá den un pènel tokante derecho sosial hustu den enseñansa. Durante e di tres dia, miembro di Konseho Insular Hennyson Thielman huntu ku profesor Van Rijn a duna e presentashon “15 aña Entidat Públiko Bonaire; na unda nos ta awor?”, den kual a resaltá e desaroyo konstitushonal i gubernamental, ekonómiko i sosial di Bonaire promé i despues di 2010. E aporte akí a lanta hopi interes den region i a suprayá e importansia di mas kooperashon den Reino. Tambe miembro di konseho insular Simeona Chirino-Felida a partisipá na un debate ku e tema: “Kiko Hulanda i e islanan ke realmente di otro aworakí?”.

Konsulta i enkuentronan

Durante e biahe di trabou, miembronan di Konseho Insular a hiba un enkuentro informal ku un organisashon di kuido i guia pa pashènt pa skucha tokante e organisashon i e opstákulonan ku nan ta enfrentá, ku atenshon spesial pa e kontinuidat di guia durante kasonan di bishita médiko. A papia tokante e impakto ku interupshonnan den e guia por tin riba e pashèntnan. Alabes a hasi palabrashonnan pa mihó interkambio i aksesibilidat di informashon, ku e meta pa oumentá e bista riba e forma di traha i e retonan di e organisashon. E miembronan di Konseho Insular a indiká ku nan ta haña importante pa tin mas klaridat, di moda ku por fundamentá desishonnan den futuro na un manera kouteloso.

Ademas, a tuma lugá un kombersashon di introdukshon ku e parlamentario europeo Marit Maij, kaminda e miembronan di Konseho Insular a duna un splikashon riba e situashon gubernamental i sosial di Bonaire i e kuadro den kual Union Europeo ta atendé ku Bonaire. Tambe a papia tokante posibel sosten for di Union Europeo i e prosesonan nesesario pa por tin akseso na fondonan pa proyektonan lokal.

Dia 15 di desèmber miembronan di Konseho Insular tabata presente na e Dia di Reino di De Haagse Hogeschool, kaminda tabata tin un programa ekstenso ku diferente profesor riba diferente tereno ku ta toka e islanan i tambe workshop nan ku temanan interesante pa amplia konosementu. Un oportunidat balioso pa topa otro, kompartí idea i fortifiká e kooperashon den Reino. 

Bishita na Raad van State

Dia 15 di desèmber 2025, Miembronan di Konseho Insular di Bonaire a realisá un bishita di trabou na Raad van State, kaminda a diskutí e posishon gubernamental di Bonaire, e ampliashon di miembronan di Konseho Insular proponé i e kambionan den WolBES i FinBES. Konseho Insular a enfatisá ku e status aktual di Bonaire ta trese retonan kuné, manera partisipashon i outonomia limitá, i ku e deseonan pa un ampliashon kualitativo di e Konseho Insular no ta keda inkluí sufisientemente. Tambe Konseho Insular a señalá e importansia di mas embolbimentu den e konsulta di proyektonan di lei, pa asina respetá palabrashonnan manera a palabrá na De Bilt i pa garantisá ku desishonnan den futuro ta kuadra bon ku e realidat na Bonaire.

Konsulta ku Eerste i Tweede Kamer

Den kuadro di e biahe di trabou, miembronan di Konseho Insular a tene konsulta ku miembronan di e komishon di Relashonnan den Reino di Eerste Kamer. Durante e enkuentro akí, temanan importante a bin dilanti, manera e kambionan di WolBES i FinBES, e Plan di Impuesto BES 2026, seguridat, enseñansa, kuido, klima i akohida pa mucha. A palabrá pa den futuro drenta den konsulta ku otro na un manera mas struktural. 

Tambe miembronan di Konseho Insular tabata presente den un reunion públiko di komishon di relashonnan den reino di Tweede kamer, kaminda a debatí tokante e kambionan di WolBES i FinBES, e Plan di Impuesto BES 2026, seguridat, enseñansa, kuido, klima i akohida pa mucha. A trese un bista mas real di e situashon na Bonaire pa loke ta trata e forma di atendé ku e islanan. A palabrá pa den futuro drenta den konsulta ku otro na un manera mas struktural. 

Riba 17 di desèmber 2025, durante e reunion di komishon di Relashonnan den Reino di Tweede Kamer, a deklará e proposishon pa ampliashon di e Konseho Insularnan i diputadonan di e islanan BES komo kontroversial. E tópiko akí tambe a keda debatí enfátikamente durante e enkuentronan di Konseho Insular di Bonaire ku e miembronan di komishon KOREL. Konseho Insular a enfatisá e importansia di un mihó bista riba e konsekuensianan gubernamental, finansiero i organisatorio di e kambionan intenshoná den WolBES i FinBES, pa asina por evaluá e efektonan di e kambionan akí ku koutela i implementá nan na un manera responsabel. Debí na e status kontroversial di e proposishon, e tratamentu i tomo di desishon lo keda posponé, lokual ta duna espasio pa konsulta i sinkronisashon ku e islanan enbolbí.

Miembronan di Konseho Insular di Bonaire ta mira bèk riba un biahe di trabou intensivo i konstruktivo, den kual a establesé kontaktonan balioso i a trese temanan importante bou di atenshon. E konosementu i palabrashonnan ku a keda hasí ta forma un base sólido pa mas kooperashon i desaroyo di maneho na bienestar di e komunidat boneriano