Miembronan di Konseho Insular di Boneiru ku biahe di trabou intensivo na Hulanda

E programa di biahe ta kuminsá dia 8 di desèmber ku preparashon di presentashon i kontribushonnan pa pènelnan pa e kongreso na Den Haag. Durante tres dianan di kongreso na Nieuwspoort, miembronan di Konseho Insular lo partisipá aktivamente den seshonnan di kontenido i debatenan pa profundisá tokante futuro di Reino, desaroyo di enseñansa sosialmente hustu i ekspektativanan mutuo entre Hulanda i islanan Karibense. 

Durante e kongreso aki, tantu miembronan komo ekspertonan eksterno lo hasi kontribushon balioso, inkluyendo presentashon di profesor Van Rijn i Hennyson Thielman, i partisipashon den pènel di diskushon di konsehalnan Désirée Coffie i Benito Dirksz.

Tambe e delegashon lo tene kombersashon ku diferente organisashon tokante entre otro, kuido, posibel lasonan di koperashon i fortifikashon di strukturanan di sosten. Tambe lo sera konosí ofisialmente ku parlamentarionan europeo.

Riba 15 di desèmber, e delegashon lo partisipá na Dia di Reino 2025 na Haagse Hogeschool, kaminda temanan aktual i stratégiko den Reino lo ta sentral. E dia despues lo sigui kombersashonnan ofisial ku e Komishon KOREL di Eerste Kamer i e Komishon Relashonnan di Reino di Tweede Kamer, kaminda lo pone énfasis riba interesnan di Boneiru.

Meta di e bishita di trabou amplio aki ta pa fortifiká e posishon di Boneiru den Reino, pa aportá na koperashon konkreto i pa pone desafionan ku e isla ta enfrentá, direktamente na atenshon di e parlamentario- i trahadónan di maneho hulandes. 

Miembronan di Konseho Insular ta spera ku e interkambio intensivo aki lo kondusí na resultadonan duradero i konstruktivo na benefisio di abitantenan di Boneiru.