TOP Boneiru ta sera konosí ku entidat publiko
Profeshonalnan hoben di TOP Bonaire a bishitá Passangrahan pa sera konosí ku e trabou di Konseho Insular di Boneiru.
Kon entidat públiko ta funshoná na Boneiru? Kiko ta e ròl di Konseho Insular i kiko ta responsabilidat di gezaghèbber? Ku e preguntanan aki i mas, partisipantenan di e Programa pa Desaroyo di Talento Boneiru (Talent Ontwikkeling Programma bonaire) a bishitá Konseho Insular na Pasangrahan riba djaweps 16 di sèptèmber.
E partisipantenan a keda risibí pa Gezaghèbber Rijna, kende a duna splikashon tokante e struktura gubernamental di Boneiru, e ròl di Konseho Insular, Grefi, i su responsablidatnan komo gezaghèbber. E Diputadonan tambe a konta di e responsabilidatnan i prioridatnan.
Durante e bishita tabatin espasio pa un kòmbersashon habrí ku e hòbennen. A trata tópikonan manera e próksimo elekshon na mart, mantenshon di e identidat di Boneiru i e kontribushon ku hòbennen por duna na e futuro di Boneiru.
Tokante mantenshon di e identidat di Boneiru, Gezaghèbber a remarká ku esaki ta sintá na promé lugá serka e komunidat mes. “Ora bo mes sa ken bo ta i kiko bo ta para p'é, otronan no por djis kita e identidat ei for di bo,” Gezaghebber a enfatisá.
Pa loke ta trata e importansia di partisipashon na e proseso demokrátiko; Gezaghèbber a duna e hòbennen un mensahe masha kla: “Korda bai vota.”
E bishita a brinda e partisipantenan e oportunidat pa hasi pregunta, kombersá tokante e futuro di e isla i siña mas tokante gobièrnu lokal i kon Konseho Insular ta funshoná.